إعداد : أحمد السماحي
بالترحيب نلتقى شهر رمضان المعظم، وبالفرحة نستقبل أنفاسه العطرة وهى تتخلل أعماق النفس فتملؤها بهجة، وروحانية وسعادة، أول أمس تصاعدت دقات المسحراتي في شوارع مصر المحروسة إيذانا بميلاد اللحظات الأولى في شهر رمضان، ومن العلامات المميزة في الشهر الكريم في الماضي كانت الفوازير، وفي عام 1963 أي منذ 60 عاما قدم التليفزيون العربي – كما كان يطلق عليه في هذا الوقت – 15 فزورة تتناول موضوعات قومية ودينية، وتاريخية.
وعلى المشاهد معرفة الموضوع أو المدينة أو الجهاز الذي يتحدث عنه النجم الذي يقدم الفزورة، وقد قدم مجموعة من نجوم الفن والرياضة هذه الفوازير من خلال برنامج (مع العائلة) الذي كانت تقدمه المذيعة (ثريا حمدان)، هذا الأسبوع في باب (صحافة زمان) نتوقف مع ثلاث حلقات من الفوازير قدمها ثلاث نجوم هم (تحية كاريوكا، كمال الشناوي، صالح سليم) وعليك عزيزي القارئ معرفة عن ماذا كان يتحدث النجوم الثلاثة؟!.
الفزورة رقم 1، تقدمها الفنانة تحية كاريوكا
عمره كذا وسنتين، لكن صلاة الزين
حاجة جميلة صحيح، حاجة تسر العين
أنيس جليس في البيت، وهو زائر جديد
يسلي كل الناس، وبرضه نافع مفيد
م البهجة والتفاريح، تلاقي فيه ألوان
وتلاقي فيه أصوات، وصوره ناطقه كمان
ورغم أنه صغير، ويدوروه زرارين
لكن رسالته خطيرة، ولسانه صادق أمين
وفيه أيدين وعقول، تخدم أموره بهمه
وقلوب تقدر وتفهم، مدى رسالته المهمة.
عرفت بتكلم على مين؟!
…………………………………………….
الفزورة رقم 2 يقدمها الفنان كمال الشناوي
نسمع منه تاريخ أمجادنا، ترفع راسك دغري لفوق
والمتحدث نفسه تاريخنا، اللي يحرك فينا الشوق
مشروع هايل متوضب له، إخراج حلو في غاية الذوق
لا فصاحته لما بينطق لغة واتنين وتلاتة كمان
بعد سنين آلافات اتكلم، صور مجد جدودنا زمان
شاف نهضتنا لسانه اتحرك، يروي السيره سعيد فرحان
ياما سواح بيجوه من بره، يسمعوا منه تاريخ أبطال
مجد فراعنه سابوا أثرهم، خالدة مهما تفوت أجيال
هندسة، طب، فنون، وحضارة، باقي أثرها في كل مجال
عرفتوا بتكلم عن أيه؟ ولا مين؟
……………………………………………………..
الفزورة رقم 3 يقدمها الكابتن صالح سليم
لينا في تاريخنا يوم معروف، بمعركة فيه مشهوره
أثبتنا فيها رجولتنا، وصيتنا لف المعمورة
جانا جيوش آل تحاربنا، بالطبع خرجت مكسوره
مدينة واحدة غلبتها، وروحتها مقهوره
رجعت تجرجر في خيبتها، والخيبة كانت موفوره
ويومها طلعت غنيوة يا محني ديل العصفوره
لسه لغاية دلوقتي صفحتها لسه منشوره
وأثرها جوه مدينتنا عايش على نفس الصوره
يوم ما انتصرنا وجرجرنا ملك الجيوش المذكورة
خدناه وخدنا قواده، جوه السلاسل مأسوره
أتشطروا على مدينتنا وبرضه خرجت منصوره
عرفت بتكلم على أي مدينة ولا على أي قرية؟