خالد تاج الدين يطلق صاروخ راب يهاجم فيه مصطفى كامل

كتب : أحمد السماحي

مشادات ساخنة، وتراشق سهام، و(بوستات) ساخرة وجارحة، حدثت خلال الأيام الماضية بين الشاعر والرابر خالد تاج الدين، ومصطفى كامل نقيب الموسقيين، والمطرب حلمي عبدالباقي عضو نقابة الموسقيين، والحكاية باختصار بعد تأجيل حفل الرابر العالمي ترافيس سكوت – Travis Scott ـ الذي كان مقررا إقامته يوم 28 يوليو الماضي لتدشين ألبومه الجديد (يوتوبيا) في منطقة الأهرامات، وذلك من خلال حفل كبير يحضره ألاف من محبينه، اشتعلت مواقع التواصل ما بين مؤيد ومعارض على تأجيل الحفل.

ومن الذين فرحوا بتأجيل الحفل مصطفى كامل نقيب الموسيقيين الذي كتب بوست قال فيه: (الحمدلله رب العالمين انتصار الحق والحفاظ علي القيم والعادات والتقاليد، لم ولن نكون أبداً ضد تنشيط السياحة، ولم ولن نمنع أياً من مظاهر الاحتفالات الفنيه بكافة ألوانها وتنوعاتها الموسيقية، مادامت لاتمثل قلقاً وخوفاً على التكوين الفكري والعقائدي لأبنائنا من الشباب المصري، قمت بأداء واجبي تجاه أبناء وطني بعد مالمسته من مخاوف وقلق وغيره علي عاداتنا وتقاليدنا، استمعت وشاهدت كل الڤيديوهات الموثقه علي مواقع التواصل الإجتماعي، وكان القرار هو الانحياز التام لآراء ووجهات النظر المحترمه

وأضاف مصطفى كامل: (رميت وراء ظهري آراء كل الأصوات القبيحه وأصحاب الفكر الشيطاني والأقلام رخيصة السعر والهدف، والمعروف هويتها وانتماءاتها غير المستحبه والمكروهة عند العبد وعند الرب، أوضحنا موقفنا كاملاً ومبرراً تبريراً منطقياً وعقلانياً وتركنا الأمر لله أولاً وأخيراً ثم لأولي الأمر الأمناء على مستقبل هذا الوطن الحبيب ، شكراً لكافة جهات الأمن بوطني الحبيب مصر على قراءة المخاوف التي نادينا بها، تحيا بلادي بالقيم والمبادئ والإحترام).

خالد تاج يعلن غضبه

 فى الوقت الذي هلل مصطفى كامل على إلغاء الحفل، اعترض وغضب خالد تاج الدين على عدم إقامة الحفل في موعده، وكتب (بوست) على صفحته على موقع التواصل الإجتماعي (الفيس بوك) قال فيه: (هى نقابة الموسيقيين مالها ومال حفل موسيقي عالمي!، حتى لو على أرض مصرية، أنت وظيفتك موسيقيين بلدك فقط، إنما تلغي حفلة عالمية عندنا دي من اختصاص وزارة السياحه أو الداخلية، يا عم احنا بلد سياحي المفروض!، عمركوا ماهتبقوا زي دبي والرياض واسطنبول طول ما مصطفى كامل كلمته ماشيه على البلد كلها).

غضب مصطفى كامل

(البوست) الذي كتبه الشاعر والرابر خالد تاج الدين لم يمر مرور الكلام حيث أثار غضب مصطفى كامل ونشر بوست خالد تاج بعد أن (شطب على اسمه) وقال: (نداء إلي المسئولين عن مستشفى العباسية، فيه ولد كاتب هذا البوست، عايز يدمر البلد، ونفسه يشتهر أنا مش عارف هو مين، قسماً بالله مش عارفه خالص، وكل ماأسأل عليه ألاقي ناس بتقوللي ده بيكتب أغاني ومعرفش يبقي (ربع) أيمن بهجت قمر أو مصطفي كامل أو فوزي إبراهيم أو أحمد شتا أو نادر عبدالله أو تامر حسين أو المالكي، أوصابر كمال، أو كتير جداً من الزملاء، هذا الموضوع أصابه بحاله مش كويسه.

 وبعدين قال هااغني راب هههههههه، وقالولي أن المشاهدات بتاعته جابت 100 جنية، وعايز مصطفي كامل يهزأه عشان يشتهر، وأنا مش بحب أهزأ حد، الولد ده والله أنا فعلاً مااعرفهوش، وبيحاول كل فتره يهدم في المجتمع  واحد حبيبي وصاحبي قاللي لازم تعمل له قضية، بصراحة أنا رديت عليه وقلت له ( أنا كده هااعمل له قيمه هو معرفش يعملها لنفسه) ألعب بعيد ياولد!)

حلمي عبدالباقي يتدخل

كما أثار (بوست) خالد تاج الدين حفيظة المطرب حلمي عبدالباقي عضو مجلس إدارة نقابة المهن الموسيقية، ورد من خلال (بوست) قائلا: (أنا عاوز اقول حاجة، وأنا مبعرفش أقول كلام وأداري أصل أول حرف من اسمه كذا!، أنا بتكلم على طول أستاذ خالد تاج الدين الشاعر، أولا انت ملكش دخل أصلا بنقابة الموسيقيين، ثانيا لما تتكلم وأنت مش فاهم.. أنت عارف الناس  بتسمي الشخص ده ايه ؟! يقصد ترافيس.

ثالثا أنا مش عارف انت شاغل نفسك بالأستاذ مصطفي كامل  ليه؟! ياتري كنت بتحلم أنك تحقق نجاحات زي اللي حققها ومعرفتش، فهذا سببلك حاله نفسيه تجاه مصطفي كامل ولا ايه بالظبط؟! بجد مش عارف أسمي تدخلك وكلامك علي مصطفي كامل ايه، خلي الناس ترد؟!

رابعا لو حضرتك شايف أن في بلاد أفضل من مصر واحنا مش هنقدر نعمل زيهم تقدر تروح تقيم هناك وتبقي ريحت واستريحت!.

خامسا وأخير أنت بتروج أن مصطفي كامل بيمشي كلامه علي الدولة، تبقي الدولة اللي تتصرف معاك ياريت بقي تبطل تتكلم وأنت مش فاهم حاجة، وآسف علي الاطاله!).

خالد تاج يسخر

من ناحيته لم يترك خالد تاج الدين (بوست) حلمي عبدالباقي يمر مرور الكرام فرد عليه بـ (بوست) ساخر يقول فيه: (هو الحقيقي بقى يا أستاذ حلمي أنا ومصطفى كامل عملنا نجاحات ممكن حضرتك مع احترامي يعني متكونش وصلتلها، وهذا لا يقلل من حضرتك خالص!، وأنا نفسي عملتلك أغنيه قبل كده واتصورت كليب كمان، لكن نجحت بصوت تامر عاشور بعد كده لما غناها في بيتهم على كومبيوتر بربع جنيه!، حضرتك دخلت نفسك في كلام ميصحش يتقال، لأني وجهت الكلام لمصطفى كامل، آه بالحق أنا بنفسن من مصطفى كامل! راجع بس (CV) خالد تاج الدين هتعرف هو مين ولو أني عارف أنك عارف، آسف للاطالة استاذنا القدير!).

صاروخ خالد تاج

بعد الهجوم الناري الذي حدث من مصطفى كامل الذي كتب من قبل يقول: (بمنتهي الصراحة، والوضوح لن أقبل بإهانة أي زميل) في الوقت الذي كتب نقيب الموسيقيين هذا الكلام أهان على أرض الواقع الشاعر المحترم  خالد تاج الدين صاحب أشهر الأغنيات لـ (سميرة سعيد، عمرو دياب، محمد حماقي، نوال الزغبي، أمال ماهر، شيرين عبدالوهاب، الشاب خالد، حسين الجسمي، وائل جسار، أصالة، كارول سماحه، فضل شاكر) وغيرهم من كبار نجوم الغناء المصري والعربي.

خالد تاج الدين لم يقف مكتوفي الأيدي بعد إهانة مصطفى كامل له، حيث أطلق صاروخ أرض جو خلال الأيام القليلة الماضية بحكم عمله كرابر، عبارة عن راب بعنوان (يابا قشطة) شن من خلاله هجوما ضاريا على مصطفى كامل، من ضمن ما جاء فيه:

معرفش يرد بنفسه خلى صبيه يعرضهاله

انتقدت موقف خدتها بشكل شخصي

تتشاكل ترقص ع الشناكل لأ هنا مش ببجي

هطلعلك من كل حته حته حته من ده حته

ومن ده حته نلم جته فرانكنشتين الفن انت

مقامك توك توكين واجره ،تغني في نصبتين مش اوبرا

عامل 20 غنوه للهضبة وأنت غنوتين وشكرا

عايش في كساد يا عيني طب عايز الاثبات عيني

حط شغلك كله غنا وتأليف قصاد “قصاد عيني “

هى توزن وزن تقل تقلك انت صيت وبق

كسر وزن و كسر حق وال “حقيقي”  مكانش “حب”

بدراعه .. فادوه ب ايه عصبيته و اندفاعه

ادعاؤه الحق داؤه حتى اسمه مش بتاعه

اسمه ناقص .. حاططلك نقطتين أكمل الناقص

عاشها راقص بين نواقص هنداديه اهو ده اللي ناقص

النجم ان غاب بقى بغبغان غمغم غباء في غباء 

غير الغلمان غضب الغيلان غارة م الغباء

مش شايف يلزملك قطره، منحط الفكرة و دي فطرة

و لوحدي بيكم اجمعين، شجاعه بتغلب الكترة

مش قسوه .. قليت ادبك خرجت مني الأسوأ ..

 اهو تسوى تراك ما يسوى .. شفت ان الراب بيلسوع

بمجهودنا ده و بايدينا وبنسلك وكتير سدينا

ناس بتركب طيارات عشان تيجي تسلم علينا

ن .. ا .. ق .. ص

دي الفريسه و ده اللي صاد

دي سياسة مش اقتصاد

خ .. ا .. ل .. د

تاج ده عمك في المجال

تشوفني تقف باعتدال.

اينك أغنية ( يابا قشطة ) :