خبر سعيد جه مولود واسمه سعيد .. !

بقلم النجمة الكبيرة : فريدة سيف النصر

وعدت الأيام تقيله لأن الكل حزين على وفاة الشيخ وناس داخلة وخارجه وقرآن وعزاء زي أيام ستي بالظبط.. الست (أم فاطمة) تعبت خالص ومابقتش تروح ولاتيجي ولا تتكلم كتير.. وكل ماتشوفني تقوللي انتي جدعة يالوزه وهاتكبري وتبقي شديدة وفاطمة هاتكبر.. خللي بالك منها مالكمش إلا بعض.. وترد حربية (أم كامل): العمر الطويل لكي يا أم فاطمة يخلليكي لنا..

وعدت أيام كتير وبقت شهور والحال هو هو أبويا ينزل ويشوف الأشغال ويجي يحكي لهم كل حاجة ماهم بقوا شركاء في كله وأنا أديني باسمع.. بس الحاجة اللي خللتني مش عارفة غلاوتي عند أبويا هاتقل ولا تفضل زي ماهيا.. ان يوم ماتعبت فاطمة وجابوا الحكيم طلعت حامل وزغردت (أم كامل) وأبويا باس إيدها وراسها وكان فرحان وأنا غيرت.. وهى حضنتني وقالت لي عايزه أخ ولا أخت يالوزة.. معرفش ليه عيطت ومن غير ما أحس قولت عايزه ستي!!.

دخلت أوضتي.. وسألت نفسي هايحصل لك ايه يالوزة لما يجي غيرك وخوفت.. لكن لقيت فاطمة داخله لي وقالت لي أوعي تفتكري حد يبقي في غلاوتك انتي أول فرحه لينا يالوزه وماتنسيش انتي الكبيرة فرق عشر سنين يعني هاتربي اللي يجيي معايا.. رديت قولت لها ولو غلط أزعق له وأقول له عيب أنا اختك الكبيره فاهم ياولد.. وضحكت فاطمة وقالت لي انتي قررتي انه ولد.. قولت لها آه هو ولد مش عايزه بنت أنا أهو..

وحضنتني وباستني حسيت انها بتحبني أوي.. وعدت الأيام جري واللي باسمعه كلمة (الآشيه معدن) والخير زاد وأبويا بقي يجيب دهب لمراته وليا بس طبعا مش زيها.. كل ده و(أم فاطمة) بقت تعبانه خالص مابقيتش تتحرك بيشيلوها ويحطوها.. ياه الست دي كانت قويه هو ليه بيحصل كده.. الله يرحمك ياستي ويرحمك ياعم الشيخ (حسن) ويرحم أمي اللي ماشوفتهاش إلا صورة.. ماهو أنا اتعلمت كلمة الله يرحم دي من كل اللي جم عندنا..

وبرضه جريت الأيام.. وراح أبويا اشتري طلبات للست حربيه ماهي بقى اللي بقت كل حاجه فاطمة علي آخرها والحاجه راقدة وأنا باتفرج.. ولقيته داخل بشمع وحلويات وقالت له حربيه (أم كامل) نسينا الموغات وعايزين وعايزين وأبويا محتاس.. وفي يوم صوتت (نينا) فاطمة وخوفت عليها أوي لا تموت زي أمي وقعدت أدعي لربنا يخلليها وأعيط وعرفت اني بقيت بحبها أوي يارب .وابويا رايح جاي وحربية والست اللي بتولدها..

فجأة صوت واء واء وطلعوا مبروك ياسي محمد.. ولد زي القمر.. عيونه حلوين طبعا ما أبويا عينيه حلوة وفاطمة عيونها واسعين وقمر.. وأنا فرحت انه ولد يعني برضه أنا بس البنت وكلهم باسوني وباسوا بعض.. بس أبويا كان هايتجنن ولد ولد وقال هانسميه ايه..

دخل جري الراجل اللي شغال معاه في المحلات وأبويا في الصاله قال له في حاجه؟.. قال له خبر سعيد مبروك ياسي محمد أفندي البضاعه كلها جه تاجر اشتراها عالأرض بضعف التمن (وكانت شبه موقوفة والحال صعب).. وقال له محتاجينك بسرعة وعايزينك تمضي وتقبض واحنا نسلمهم.. ومبروك ماجالك علي وشه بقي.. ده يوم سعيد وخبر سعيد ونزل الراجل..ورديت أنا وقولت أبويا انت بقيت سعيد وبتضحك وأخويا كمان هايبقي سعيد وهايضحك..

رد أبويا يسلم بوءك يالوزة.. وهو إن شاء الله يبقي سعيد طول عمره والسعاده تحت رجليه وحواليه.. ودخل على فاطمة ماسكني وأنا معاه وقال لها سعيد ابننا هاسميه سعيد.. سعيد محمد أبو النور.. وكالعاده قالت (اللي تشوفه ياسي محمد) وأنا بوست سعيد ومعرفش فرحت ليه وحبيت النونو الجميل أوي ده.. ياتري الأيام فيها إيه وأم فاطمة هاتعمل إيه؟.. وسعيد هايبقي معايا ازاي؟.. وأبويا شغله هايفضل كويس؟.. وأنا هايجرالي إيه؟..

كل دي أسألة لوزة الذكيه اللي مابتبطلش لا أسأله ولا استفسارات ولازم تفهم ليه وعلشان إيه.. (أمي لوزة قالت لي ليا أنا فريدة إن أم فاطمة مسمياها الغلباويه).. هانشوف الدنيا فيها إيه ليكي يالوزة ؟!